धूम्रवर्णं तथाष्टमम

 हे गौरीतनया, भालचंद्रा, तुला वंदन करणं, तुझ्यापुढे नतमस्तक होणं यापरतं सुख कशातच नाही हे मी जाणलं आहे.

तुझं आणि माझं अस्तित्व एकरुप व्हावं हीच तर ईच्छा मनीमानसी आहे. पण आपल्यामध्ये हा जो धूमासारखा पातळ पडदा आहे तो माझ्या बुध्दिभ्रमाचाच आहे.

केवळ तुझ्या कृपाशीर्वादानेच हे पटल विरुन जाईल. आणि याच तर क्षणाची मी युगानुयुगे वाट बघतो आहे.

हे अनंतनायका, मझी वाणी, माझे विचार, माझी कृती यापैकी कोणत्याही द्वारे

कुठल्याही विभ्रमाचं आभासी पटल तात्काळ नाहीसं होऊ देत.

या वरदानाच्या प्रतीक्षेत आहे रे मी.

श्रीकुल

भाद्रपद शु. एकादशी शके १९४२

29/8/2020

सप्तमं विघ्नराजेंद्रं

 हे गोसावीनंदना, मुनीजनसुखकारका तुला वंदन करतांना माझं ह्रदय उचंबळुन येतं आहे.

तू असुरांसाठी विघ्नकर्ता आहेस तर भक्तजनांकरिता विघ्नहर्ता आहेस. तू आणि मी खरेतर एकमेकांचीच रुपे आहोत असं असतांना हा द्वैतासुर माजला आहे.

मला माझ्यामध्ये तुझा अनुभव घेण्यांआड या द्वैताचंच मोठं विघ्न आहे. तू तुझ्या नांवाला जाग आणि समूळ नाश कर या भिन्नभावनासुराचा.

मी अधीर आहे तुझं सर्वमंगलकारी स्वरुप माझ्याआंत अनुभवायला.

हे पाशांकुशधारा, माझी वाणी, माझी कृती, माझे विचार, माझी दृष्टी यासर्वांमध्ये

तुझा अंगीभूत गोडवा वसुं देत.

'तथास्तु' म्हणतो आहेस ना?

श्रीकुल

भाद्रपद शु. दशमी शके १९४२

28/10/2020

षष्ठं विकटमेवच

 

हे ओंकारस्वरुपा, अनाथनाथा, तूला वंदन आणि तुला नित्यवंदना देण्याचं भाग्य तू मला दिलंस याबद्दल मी कृतज्ञ आहे.

तुझा विचार करावा तितका तू अनाकलनीय वाटतोस रे! जरी तू विश्वातील प्रत्येक गोष्टीचा 'मूळारंभ आरंभ' असलास तरीदेखील तुला समजुन घेण्यासाठी कोठुन सुरुवात करावी हेच उमगत नाही.

माझ्या मनोलहरी अशा अस्ताव्यस्त झाल्यावर तूच त्यांना आवरुन घेतोस.

हे गौरीसुता,तुझ्या नित्यस्मरणाने माझा प्रत्येक शब्द, प्रत्येक विचार आणि प्रत्येक कृती अशी

'गणेशसुत्रा'मध्ये बांधली जावो.

श्रीकुल

भाद्रपद शु. नवमी शके १९४२

27/8/2020

लंबोदरं पंचमंच

 

हे दयानिधे, भक्तवत्सला, तुझा कृपाहस्त सदैव माझ्या मस्तकी असावा अशी मी प्रार्थना करतो.

तुझी परिमाणंच आगळी आहेत. खरंतर आम्हांला ज्ञात असलेल्या परिमाणांच्याही अनेक अंगुळे तू वर आहेस. हि विशालता माझ्याही ह्रदयांत असावी हेच तू कल्पिलं असशील ना?

सर्व ब्रह्मांड सामावुन घेता यावं ईतकी मनाची विशालता असावी हेच तू तुझ्या आकाराद्वारे मला सुचवतोस ना!

हे मंगलमुर्ती, माझ्या शब्दांतुन, विचारांतुन, कृतीतुन तुझ्यासम ह्रदयाची विशालता कायम व्यक्त व्हावी येवढंच ईवलुसं मागणं आहे रे माझं.

श्रीकुल

भाद्रपद शुं अष्टमी शके १९४२

26/8/2020

गजवक्त्रं चतुर्थकम

 हे सिंदुरवदना विद्याधीशा, ज्याच्या केवळ स्मरणानेच मनोकामना पूर्ण होतात त्या गणाधीशा तुला नमन.

तुझं नित्य स्मरण मला राहो कारण तुला आठवतांना तुझं ते मोहक रुप अंतर्चक्षुंसमोर येतं. मन हरखुन जातं.

गजशुंडेला मुख म्हणुन मिरवुन तू सहचर्याचं अद्भुत रुप दाखवतोस ती सहचर्याची भावना आणि प्रेरणा माझ्यामध्ये निर्माण होऊ देत.

चराचराविषयीची हि आप्त भावना हा माझाही स्थायीभाव व्हावा यासाठीच तू हा अवतार धारण करतोस ना?

हे विशालमस्तका, तू माझ्या शब्दांतुन, कृतीतुन, विचारांतुन तर अव्याहतपणे व्यक्त होत रहाच, पण इतरेजनांशी माझा होणार्‍या व्यवहाराचं तु अनुष्ठान व्हावंस.

होशील ना रे?

श्रीकुल

भाद्रपद शु. सप्तमी शके १९४२

25/8/2020

तृतीयम कृष्णपिंगाक्षं

हे गणनायका सकळकलाधिपते, माझ्या सर्व क्षमतांसह मी तुला वंदन करतो.

माझ्या अस्तित्वाचा मूळ गाभा तूंच आहेस पण अवचित मला या सत्याचा विसर पडतो. तू माझ्या आंत तर आहेसच पण बाहेरही तूंच तर आहेस. तू सर्वव्यापी आहेस. म्हणुनच 'सर्वतो मां पाहि पाहि समंतात. माझी दृष्टी जाईल तेथे तेथे तूंच आहेस.

हि माझी दृष्टी तुझ्या कृपेने आंत वळलेली असु देत. तुझ्या मंगलमय अस्तित्वाच्या प्रखरतेने माझ्यातल्या अमंगळाचा नाश होऊ दे.

खरंतर असं करशील का? माझी दृष्टीच 'गणेशमय' होऊ देत. सर्वत्र मला मग मंगलप्रभाच दिसु लागेल.

माझ्या वाचेमध्ये तू, माझ्या विचारांमध्ये तू, माझ्या दृष्टीमध्येही तू असशील तर मीच 'मंगलमूर्ती' व्हावं हे तुझंच स्वप्न साकार होईल.

श्रीकुल

भाद्रपद शु. षष्ठी शके १९४२

24/8/2020

एकदंतं द्वितीयकम

हे गणराया, तू सुखकर्ता आहेस दुःखहर्ता आहेस पण तूच कर्ताकरविता देखील आहेस.

याहुन महत्वाचं म्हणजे तू मार्गदर्शक आहेस. 'त्वं साक्षादआत्मासी नित्यम', म्हणजे तूच माझा आत्मा आहेस असं मला जाणवतंय. मी पार्थिव तर तू माझ्या गाभ्याशी असलेलं अपार्थिव तत्व.

                                                                 'त्वमेव प्रत्यक्षं तत्वमसि'.

प्रकाशापासुन प्रकाशाकडे प्रवास करतांना मध्ये 'देह' नांवाचा जो विसावा आहे त्याचा मूलाधार तर तुच आहेस ना रे? माझ्या अंतरात्म्याचा आवाज म्हणजे विवेकबुध्दीरुपी 'श्रीगणेश'. म्हणुनच या अंतरात्म्याचं प्रमाण मानुन केलेली माझी प्रत्येक कृती शुध्द असते.

 

अज्ञानाकडुन ज्ञानाकडे म्हणजेच तिमिरातुन प्रकाशाकडे होणारा प्रवास तुझ्याच तर साक्षीने होतो. नव्हे तूच तर हा प्रवास घडवतोस.

 

हे 'आत्मरुपा' तू असाच पथदर्शक होऊन रहा. माझ्या प्रत्येक विचारात, प्रत्येक उच्चारात, प्रत्येक कृतीत तुझंच अनुष्ठान असुं देत.

 

श्रीकुल

भाद्रपद शु. पंचमी शके १९४२

23/8/2020